Од 22 до 25 мај 2024 година ќе се одржи шестото издание на Athens Music Week (Атинска музичка недела). Настанот се одржува во Technopolis City of Athens и е еден од најголемите настани за музичката индустрија во регионот.
Веќе традиционално подготовките и најавата за фестивалот започнуваат со отворен повик за учесници во шоукејс програмата. Може да се пријават талентирани музичари и групи од Грција, но и однадвор. Учеството на фестивалот нема жанровски ограничувања. Изведувачите ќе можат да се претстават пред музички професионалци и експерти од целиот свет што би можело да им отвори „нови врати“ и да им помогне во нивната кариера.
Официјално пријавувањето за изведувачи заврши на 31 декември 2023 година, па сега продолжуваат подготовките за фестивалот.
Athens Music Week (AMW) е музички настан кој секоја година се одржува во Атина, Грција. Настанот ја промовира музичката индустрија и изведувачите во регионот. Претставува и платформа на која може да се сретнат и да се запознаат музичарите, професионалците во музичката индустрија и музичките ентузијасти. На настанот се вклучени различни активности кои се релевантни за сите. За публиката има концерти во живо и панел дискусии, а за професионалците можност за учество во работилници и за вмрежување со претставниците на музичката индустрија од регионот. Атинската музичка недела е во организација на Technopolis City of Athens и NPO MESO Music Events.
Вообичаено конференцијата во Атина се одржува во јуни, но оваа година настанот ќе се одржи порано.
