Недела, 17 мај 2026, Скопје, Во скопското Дебар маало во 12:00 часот на пладне се случи промоција на нов музички албум. Називот на албумот е Холимуд (Holymood) од Максимовски јунајтед (Maksimovski UTD или Maksimovski United). Носител на овој проект е реномираниот бас гитариста Џоле Максимовски, кој во оваа прилика им се заблагодари на сите учесници во реализацијата на албумот. Покрај самиот Максимовски, учесниците на албумот се Дино Милосављевиќ, Александар Никодиновски, Филип Димишковски, Александар Ванчовски – Џигер, Александар Кацарски – Кацар, Владан Дробицки, Мите Димовски, Давор Јордановски, Сенад Усеин и Дарко Тасев.
Албумот има 8 композиции:
- Holymood
- Sakam
- Hey It’s OK
- Badnik
- Star Lisec
- Hip Folk
- Za Despina
- Familija
Албумот е снимен во две студија, „Тра Ла Ла“ и студиото на Александар Ристовски – Принц. Музички продуцент на албумот е Мите Димовски. Дизајнот на омотот е на Александар Николовски.
На промоцијата присуствуваа дел од учесниците во албумот Холимуд. Покрај нив присутни беа и еминентни личности од домашниот музички свет. Некои од нив се Валентино Скендеровски, Петар Младеновски – Пеце и Благоја Антовски – Баге.
Албумот „Холимуд“ е достапен на Бендкемп (Bandcamp), а од понеделник, 18 мај, албумот ќе биде достапен во продавницата Ре:Старт во Градскиот трговски центар во Скопје, а понатаму и на други места.
