Босна и Херцеговина отсекогаш имала извонредни музичари, пејачи и музички автори. Тоа е уште една причина за нашата голема желба да ја набљудуваме и истражуваме музиката и уметниците од оваа земја со прекрасни луѓе и природа. Овој пат разговараме со Сара Војичиќ од Сараево, извонредна вокалистка. Подгответе се за истражување на нејзината музичка моќ и волшебните приказни кои се расплетуваат во ова волшебно интервју со Сара Војичиќ направено од Урош Вељковиќ!
За прв пат те забележав на една ТВ емисија каде со Зеле Липовача и бендот ја пееше „Living in My Dreams“, одлична преработка на песната на големите Дивље Јагоде. Додека те гледав, веднаш помислив: ова отсега ќе биде мојата омилена пејачка од бившите Ју простори. 🙂 Како се случи таа соработка?
Ти благодарам! Тоа е прекрасен комплимент. Два месеци пред таа соработка гостував во истата ТВ емисија на нашата национална телевизија и имав мини концерт со нивниот бенд. Зеле дојде го договори неговиот концерт, а бендот му го пушти мојот концерт. Тој всушност го виде пред мене. После тоа ме праша дали сакам да отпеам две песни со него и секако се сложив. Ја избрав „Living in My Dreams“, но во нов аранжман што го направиле пред неколку години за хрватската верзија на „Сама си“. Таа гитара навистина го зголемува вајбот. Другата песна, „Come with a Rainbow“, е емотивна балада од неговиот соло албум, па затоа бев многу среќнa што уште еднаш покажав две мои страни.
Кажи ми, колку долго постои Долиа? Која година се формиравте и дали низ годините свиревте многу концерти и фестивали заедно?
Под името Долиа, бендот постои од 2012 година, но во овој состав од 2018 година. На почетокот, нашиот музички стил беше нешто поинаков и всушност ние свиревме на многу фестивали во регионот. Кога им се приклучив на 14-годишна возраст, јас бев виолинист во бендот. Многу луѓе поминаа низ овој бенд, но работите почнаа драстично да се менуваат кога во 2013 година се приклучи нашиот гитарист. Тој донесе нови стилови, песни и аранжмани. Сè уште свирев на виолина во тој период, иако сите сакаа да пеам. Конечно се сложив да пеам во 2016/2017 година и тогаш започна оваа приказна. Никогаш не сакавме да го смениме името, бидејќи јас и Ерик сме првите членови на бендот, но и поради фактот што Ерик беше тој што го донесе концептот на фантазија. Може да се каже дека ние всушност никогаш не отстапивме од она за што се залагаме, но пораснавме, и музички и лирски, и продолживме да се бориме за идејата, за разлика од некои други членови, кои се откажаа. Во 2018 година ја направивме нашата последна свирка, а потоа се затворивме во студио. Тоа беше незгоден период, бидејќи ни требаше долго време да најдеме совршен тим, а пандемијата беше уште една пречка. Но, во 2020 година, почнавме да работиме со словенечкиот продуцент Симон Јовановиќ и сè почна да звучи како што треба. Пред тоа, речиси сите ни велеа дека не можеме да го добиеме звукот што го сакаме. Истото важеше и за видео продукцијата. Кога нашиот видео режисер се појави во нашите животи, нашиот свет на фантазија почна да оживува.
Дали членовите на бендот се исти од самиот почеток?
Јас и Ерик сме првите членови на овој бенд, но ако ме прашате мене, официјалниот почеток на овој бенд е означен со издавањето на „The Gift“, бидејќи ако Риад не дојдеше во бендот, можеби Долиа немаше да постои, или ќе беше повеќе готик метал бенд со оперски вокал (и веројатно друг пејач), а не симфониски/прогресивен метал бенд со класични и етно елементи, како што е сега. Друга причина за ова да се нарече „официјален почеток“ е фактот што „The Gift“ е всушност првото професионално издание на Долиа проследено со спот.
Што значи името „Долиа“? Како ја добивте инспирацијата за името?
Првиот пејач на овој бенд го даде името, а јас толку многу го сакам неговото значење што никогаш не сакав да го сменам. Исто така, идејата за „Долиа“ никогаш не се промени за нас кои сме во бендот, па сакавме ние да бидеме тие што ќе ја раскажат приказната. Името „Долиа“ доаѓа од словенската митологија и се однесува на божицата на верата и среќата. За нас, Долиа е мултиверзум и свет на огледала каде многу светови се судираат, во кој се испреплетуваат фантазијата и реалноста.
Сара, дали имаш свирено во други бендови или проекти пред Долиа? Дали имаш нешто издадено пред „The Gift“, можеби сингл, видео, EP или албум?
Ова е мое прво издание кога станува збор за авторска музика, но претстојат уште многу. Напишав некои песни, а јас и Риад сè уште размислуваме дали некои од нив ќе бидат објавени како мои соло изданија или ќе бидат дел од материјалот на Долиа. Ќе видиме. Долиа е мојот единствен бенд и тој ми е приоритет, но јас сум активна и како соло пејач во многу проекти во мојата родна земја поврзани со рок музиката, музичкиот театар и класичната музика. Се радувам на уште една „метал“ соработка. Снимив преработка на „Ever Dream“ (Nightwish) заедно со неколку неверојатни музичари од Словенија и ќе објавуваме спот за неа. Јас сум навистина горда на таа соработка, бидејќи NW е еден од моите омилени бендови, а Floor Jansen е една од моите омилени „метал“ пејачки. Се разбира, јас сум обожавател и на Tarja, но направивме верзија која е поблиска до легендарната изведба на фестивалот Wacken.
Кажи ми нешто повеќе за креативниот процес на „The Gift“. За мене, тоа е концептуална песна. Дали е дел од поголема концептуална приказна како албум?
Сосема си во право. „The Gift“ е првата песна од претстојното EП но всушност е дел од приказната за нашиот трет албум. Значи, во основа, приказната за нашиот целосниот деби албум се случува 20 години пред приказната за нашето ЕП. Во „The Gift“ најсилни се влијанијата од словенската митологија. Нашиот главен лик ја запознава Морана, словенската божица на зимата и смртта, повторното раѓање, соништата и заштитничка на жените, која всушност на главниот лик му дава нов живот без болка. Причината за тоа ќе биде откриена во третата и последна песна од претстојното ЕП. Креативниот процес беше многу природен. Риад го направи оркестарскиот аранжман, а секако, јас и Ерик учествувавме во тоа. Всушност, има многу детали, не само во оркестарот, туку и во делниците за гитара, бас и тапани. Сè што слушате е со причина и има своја приказна. Мојот омилен дел беше сложувањето на вокалите и правењето вокални аранжмани, затоа што тоа е секогаш јаготката на шлагот. Постои и оној говорен дел во кој има ржење, во кој дефинитивно експериментирав и планирам да продолжам да го правам тоа во иднина. Сите три песни од ЕП-то се подготвени за објавување, но треба да снимиме уште два спота. Втората песна треба да излезе во декември. Таа песна е и насловна на ЕП-то и ќе ја откријам вистинската приказна зад оваа фантазија.
Спотот за синглот „The Gift“ е со одличен квалитет. Кој е режисерот, сценаристот и продуцентот на спотот?
Ти благодарам. Навистина сме горди на тој спот. Режисер на спотот е Тарик Хоџиќ, познат по неговиот документарен филм „Scream for Me Sarajevo“. Штом ги слушна песните од ЕП-то, како и приказната зад нив, тој рече дека сака да го направи спотот и тој навистина направи сѐ за да изгледа така како што изгледа. Тој собра прекрасен тим од професионалци, кои се навистина неверојатни во она што го работат и сите пристапија со многу љубов, страст и посветеност. Што се однесува до сценариото, ние ја донесовме работната верзија, а потоа за сѐ разговаравме со Тарик и секако му дозволивме да го прави тоа што го прави најдобро. Не можевме да посакаме подобар тим и многу сме горди што работиме со овие луѓе.
Кои се твоите следни планови со Долиа? Прочитав дека подготвуваш ЕП од неколку песни. Дали ќе има уште спотови?
Да, сите три песни од ЕП-то ќе бидат објавени заедно со спотови. Имаме приказна, која сакаме да ја раскажеме правилно, но и да ја покажеме градацијата на нашиот главен лик. Веќе сме во процес на продукција на нашиот втор спот, кој се надеваме дека ќе биде објавен во декември. Со третиот сингл и спот ќе ја заокружиме приказната за ЕП-то и ќе направиме соодветна промоција на песните и спотовите. ЕП-то ќе биде објавено дигитално, но и во ЦД формат.
А целосен албум? Дали планирате да снимате целосен албум, ЦД, или можеби дури и винил?
Веќе сме во процес на снимање на концептуален албум со девет песни, кој ќе биде готов во 2024 година. Ќе биде издаден како ЦД и винил, но и во дигитален формат. Имаме неколку понуди од странство, па ќе видиме како ќе се одвиваат работите. Овој албум е навистина разновиден и сигурна сум дека никој не очекува такво нешто од нас. Има многу различни влијанија, а сето тоа е така спакувано за да ѝ послужи на приказната зад албумот. Едвај чекам да ги споделам тие песни со вас. Има по нешто за секого.
Дали можеби планирате турнеја на Балканот, низ Европа, или можеби дури и светска турнеја?
Откако ќе излезе албумот, ќе почнеме да го промовираме во живо. Дефинитивно планираме да направиме балканска турнеја, но планираме да свириме и низ Европа. Што се однесува до светската турнеја, тоа е нашиот сон, но треба да почекаме и да видиме каде ќе не однесе оваа приказна. Веќе имаме покана да свириме во Аргентина и се надевам дека тоа ќе се случи во блиска иднина. Има уште многу работа, но повратните информации за нашиот деби-сингл ветуваат, па сигурна сум дека ќе го најдеме својот пат. Планираме во живо да направиме промоција на нашиот албум во нашиот роден град, а има можност тоа да го направиме со полн оркестар. Ајде да видиме!
Дали имате некои други проекти покрај Долиа?
Од аспект на металот, засега не. Но, овој месец имам музичка премиера, а потоа ја имам честа да пеам на концертот „Три тенори“ во Сараево. Кон крајот на месецот ќе бидам дел од неколку кабаре шоуа и концерти во Босна и Херцеговина, така што темпото е навистина динамично. Секако дека ќе има повеќе соработки, но во моментов главниот фокус ми е да ги завршам спотовите за ЕП-то, како и снимањето на албумот.
Ти благодарам Сара за ова интервју и се надевам дека наскоро ќе те видиме со Долиа во живо на турнеја. Дали имаш нешто за крај што би сакала да го споделиш со сите сегашни и идни обожаватели?
Ви благодарам! Голем поздрав до вас и вашите читатели. Ве поканувам да го слушнете и погледнете спотот за „The Gift“ и да го споделите доколку ви се допаѓа! Слушајте метал и подгответе се за многу повеќе наскоро!
